एकीकृत नेकपा माओवादी केन्द्रीय समितिको चालू बैठकमा अध्यक्ष पुष्पकमल दाहाल प्रचण्डले पेस गर्नुभएको प्रतिवेदनमाथि पार्टीका उपाध्यक्ष डा। बाबुराम भट्टराईले असहमति जनाउनुभएको छ।
अध्यक्ष प्रचण्डद्वारा प्रस्तुत कार्यनीतिसम्बन्धी प्रतिवेदन सारसंग्रहवादी भएको र अहिले जनविद्रोहमा जानुपर्ने अवस्था नरहेको भन्दै नेता भट्टराईले असहमति जनाएपछि प्रचण्ड अप्ठ्यारोमा पर्नुभएको छ। पालुङटारको बैठकले दिएको निर्देशनमुताबिक अध्यक्ष प्रचण्ड नहिँडेको र मेलमिलापको कुरा गरेर पनि आफूले उठाएका विषयलाई नसमेटिएको भन्दै नेता भट्टराईले असहमति जनाउनुभएको छ।
पार्टीनेता मोहन वैद्य र नेता भट्टराईका फरक प्रतिवेदनलाई समेट्न प्रयत्न गरिए पनि मूल विषयलाई अध्यक्ष प्रचण्डले बेवास्ता गर्नुभएको डा। भट्टराईको आरोप छ। प्रधान शत्रु भारतलाई मान्ने कि नमान्ने आगामी राजनीतिक कार्यनीति के हुने शान्ति र संविधानलाई प्राथमिकता दिने कि जनविद्रोहलाई प्राथमिकता दिने भन्ने विषयमा पार्टीभित्र विवाद देखिएको छ।
नेता भट्टराईले शान्ति र संविधानलाई प्राथमिकता दिएर त्यसैका लागि नै आन्दोलन गर्नुपर्ने धारणा राख्दै आउनुभएको छ भने अर्का नेता वैद्यले जनविद्रोहमै जानुपर्छ भन्दै आउनुभएको छ। वैद्यको विचारलाई समेटेर अध्यक्ष प्रचण्डले पनि आफ्नो प्रतिवेदनमा जनविद्रोहकै प्रस्ताव गर्नुभएको थियो।
नेता भट्टराईले शान्ति र संविधानलाई प्राथमिकता दिएमा जनयुद्ध को मर्म र भावना मुखरित हुने तर्क राख्नुभएको छ। नेता भट्टराईपक्षले अध्यक्ष प्रचण्डको प्रतिवेदनउपर नोट अफ डिसेन्ट राखेपछि छलफल दुई धारमा बाँडिएको छ। प्रतिवेदनमाथि छलफल हुने क्रम जारी छ र बैठक आज पनि बस्नेछ। भट्टराईले प्रतिवेदनउपर असहमति जनाएपछि केन्द्रीय समितिको चालू बैठकबाट पनि एकल प्रतिवेदन पारित हुने सम्भावना न्यून देखिएको छ।
No comments:
Post a Comment